“Allora è sei!” le fa a copp a’ mana Nunziatina, appontanno ‘no fasule ‘ncopp ‘a cartella.
“Terno! Terno!”: a Zibacchiell nisciune a rrepar, ha schizzat comme a n’anguilla, ‘a pupatella!
“Aèè, guaglionce’ già hai accumminciate cu ‘nu sirice tant!”
“Ma l’hai chiammat ‘o 34? Cà s’hanno spostat tutt ’e fasule!” s’allammenta zia Gloria.
“E tu tiene ‘u ninnill mbraccia! Chillo tene ‘a manella ‘e ‘nu riavolo!”
“Marò, guagliù, se sent ancora addore ro’ capitone fritto e ro’ baccalà pe’ tutta ‘a casa!” mormolea cacchirune.
“Azz… e ra’ menesta ‘e Natale, no?”
“Zitt! Jamm appriess, no’ facite tutto ‘stu burdello, je nun ce capisco niente”
“E spilete ‘e recchie”
Don Peppino: “No’ vi distraete, asciute ‘a guallera”
“40!”
“Ma possibbile ca je nun aggio mise manco nu nummero?” chiagne e s’allamenta Soniuccia. “M’avite dat ‘e cartelle sfurtunate. Aropp voglio chelle addò sta scritt ‘Niculino’, chelle vecchie e cunzumate”
“Guagliù ‘a mano è libbera. Trenta!” fa don Peppino.
“…e palle do’ tenente!”
“M’aggia fa’ ‘na rattata, ca nun aggio mise manco ‘nu nummero” allucca Niculino. “Avuot ‘sto panaro!”
“Chest è ‘a man e chist è u culo do’ panaro….Vintune, ‘a femmena annura!”
“Quaterna” se ne esce toma toma zia Rita.
“Avilloca, zitta zitta ha mpizzat tutte ‘e nummer!”
“Tiè, so’ triciento lire”
“Accussì poco?”
“ e che vuo’! Avite vulut fa’ vint lire a cartella, ‘sti pirucchiuse!”
Don Peppino se sose: “Aggio fa’ nu giro attuorno a seggia, pe’ cagnà ‘a furtuna” e se mette a girà.
“Piccolì, puort duie struffol, ca portano furtuna, jamm già pe’ quintina”
Piccolina nun so fa dicere doie vote. A vide e purtà ‘na guantiera ‘e struffole a cuppolone.
“Facite spazio ‘ncoppa ‘a tavola!”
Quant’è bella e sorridente ‘a patrona ‘e casa! ‘o marito se mett a cantà ‘a canzona do’ capitone: “Primme ‘e tutto nun saccio si o sapite ma muglierema è nu muorzo sapurite…. E si vedite che mmuina, che fracasso e che rivuoto, â succies ‘a rivoluzzìone tutt pe’ mezzo ro’ capitone!”
‘A tavulata ride e canta. E mane arrobbano i struffoli e pe’ tramente don Peppino allucca: “Guagliù ‘a mano è libbera! È asciuto ‘Onna Pereta fore ‘o balcone, 43! ‘O cantero, vintisette! Comme ‘o vuot e comme ‘o gir, sissantanove! Sissantotto, ‘a zuppa cotta!”
“Basta a me!” fa Norma.
“Ih chi culo!” mormolea ‘ntussecat Niculino, ca nun vo’ mai perdere.
“Jamm pe’ tombola, mo vaco veloce” dice don Peppino. “L’omme ‘e merda, Sittantuno. Ottantacinque, ll’aneme ‘o priatorio. Ottantadoie, ‘a tavula ‘mbandita.”
“Tombolaaaaaa!” allucca Saretta, a cchiù piccerella.
“Che mazzo scassato!”
“E mo jocamm a sette e mezzo e po’ a rubamazzetto, e po’ Soniuccia ce recita ‘a livella!”
Nessun commento:
Posta un commento